حوار مع اعضاء الاسطوره .. بس كل عضو لوحده ..

خلاص يا ساره انتى ادبستى وخلاص



احسن حاجه ليكى انك تجاوبي على الاسئله احسن يفتكروكى بتهربى

وبالمره حدي كام سؤال اه

1-انتى ايه اكتر حاجه بتنرفذك واكتر حاجه بتفرحك؟
2-اكتر موقف محرج اتحطيتى فيه؟
3-احرجتى حد قبل كده؟
4-ايه احلامك للمستفبل؟
5- ايه الحاجه اللى كان نفسك فيسها وبعد ما حققتيها ندمتى؟

كفايه عليكى كده انهارده




ونواصل بعد الفاصل:)

لا طبعا سلامتك يا سارة
بس تعرفي.....انا فرحانة جداااااااااا فيكى قصدى فرحانلك يعنى
عشان كده هسال انا كمان اشمعنى؟؟؟

سارة....مين اقرب الناس ليكى؟
مين مثلك الاعلى؟
اكتر حد بتحبيه في الدنيا؟
عمرك اعجبتى بحد؟ ولو اه عملتى ايه؟
سؤال مهم لتانى مرة يتسالك:مواصفات فتى احلامك وشايفاها في حد ولا لسه؟
اكتر حاجة بتعجبك في الولد؟
اكتر حاجة بتحبيها فيكى؟
اكتر حاجة بتعملييها مضايقاكى ونفسك تغيريها؟
وطبعا مقولتوش اسمى في قايمة الاعضاء اللى هتقولى رايك فيهم عشان كده تقولى رايك فيااااااا
وحاولى طبعا تكذبى شوية


وسلامتك يا قمرررررررررررر وان شاء الله تخفى وتبقي كويسة وتجاوبى كويس












في الميدتيرم

لاااااااااااااااااااااااااااااا حراااااام بجد






بعد ما جوبت اسئله كوين كلها البتاع فصل وكل شىء ضاع ( وش بيعيط )
كله منك يا بندووووووق ( وش متغاظ وهيفرقع )

ماشى .. المهم ان اسامه قالى الحكايه دى قبل كده ..
بس انا بكسل لسه هكتب فى الورد وبعد كده اعمل كوبى باست ....:)

رأيى فى نفسى ..


لا انا مش بعرف اقول رأي فى نفسى .. مش عارفه فعلا ً
كل ما اجى احاول اكتب ما بلاقيش حاجه اقولها

ومش هتجاوبى على اسئلتى يا بشمهندسة
يالا اسرع(لا تؤجل عمل اليوم الى الغد) على رايك
والا هيكتر عمل اليوم

اسئله الانسه كوين ...

1-انتى ايه اكتر حاجه بتنرفذك واكتر حاجه بتفرحك؟

اكتر حاجه تنرفزنى ..
هقولك مش بحب لما بكون بتناقش مع حد فى موضوع وهو اصلا ً مش عارف حاجه عنه
يصر على اللى فى دماغه يحسسنى انى غبيه مع ان العكس صحيح ..
مش بحب الناس المنافقين خااااالص يعنى الحاجات العاديه اللى بتضايق اى حد دى ..
اللى بيفرحنى انى اشوف واحد او واحده محترمين ومتدينين والناس المتفائله بحس اوى ان الدنيا لسه بخير ..


2-اكتر موقف محرج اتحطيتى فيه؟

موقف محرج .. لا بصى اكتر حاجه محرجه ان لما حد يجى يسلم عليا بقلب اوى وكده
وانا اقف متنحه عشان مش فاكره مين اصلا ً اينعم بسلم وخلاص بس بكون مكسوفه من نفسى اوى بصراحه .



3-احرجتى حد قبل كده؟

مش بحب اجرج حد ومش بعرف اصلا ً بس هى اكيد حصلت وقت اضطرار يعنى .. واكيد الشخص يستحق .



4-ايه احلامك للمستفبل؟

المستقبل .. بحلم انى اعيش حياه هاديه وسعيده وانى اعمل حاجه مهمه فى الامه دى مش عايزه اموت من غير ما اعمل جديد عشان مبقاش زيى زى اى حد عاش ومات معملش حاجه ربنا يقدرنى ان شاء الله .



5- ايه الحاجه اللى كان نفسك فيها وبعد ما حققتيها ندمتى؟

سعات بندم انى دخلت كليه الهندسه اصلا ً .. يعنى لما بتعب من المشوار اوى او لما بقابل واحد من صحابى بتوع ثانوى كلهم دخلوا تجاره انجليش اصلا فبحس انهم ريقين ومعندهومش ميدترمات ولا حاجه بقول يارتنى دخلها معاهم .. بس لاطبعا ً الحمد لله اوى برجع اقول اصلا ً محدش راضى بحاله واكيد هما كمان مضايقين انهم مش فى هندسه .. هى دى طبيعه النفس البشريه .




معلش بقى الالوان والحجات دى مش شغاله عندى ..

مواصفات فتى الاحلام ؟ ؟ ؟ غير انه يركب حصان ويخطفك وراه والكلام ده

غير انه يركب حصان اصلا ً مين قال انى عايزاه راكب حصان
لا انا عايزه حاجه جديده بقى يا بندوق يعنى ممكن حمار مش لازم الحصان ... :p
فتى احلامى .. عايزاه يكون انسان متدين اولا ً طبعا ً عشان اللى يعرف دينه كويس اكيد كل حاجه فى اخلاقه هتبقى متظبطه بقدر الامكان طبعا ً ..
عايزاه انسان بمعنى انسان يحترمنى ويقدرنى يكون حساس ورقيق ويحبنى طبعا ً
بص انا شايفه صوره معينه للزوج فى خيالى بيمثلها والدى الله يرحمه بجد بجد ملقتش راجل زيه انا نفسى زوجى فى المستقبل يكون كده .



اولا ً لو جالى عريس لسه بيدرس يعنى اكيد انا كمان لسه بدرس
وانا اصلا ً مش مقتنعه انى ارتبط طول ما انا بدرس نهائيا ً وماما كمان شايفه كده
بتقولنا دايما ً لما تجيبولى بكلوريوس الهندسه ... :)




لو حبيبك خانك ؟ ؟ حتسامحيه ولا حتتصرفى ازاى
مش عارفه يا بندوق بصراحه .. بس اعتقد ان الخيانه صعبه اوى اوى



ايه رايك فى الحب ؟ ؟ وليه علاقه بالماديات ولا لاء

رأى ان الحب حاجه طبعا ً جميل جدا ً بس للاسف مفهومنا الغلط عنه الايام دى اسأ اليه جامد اوى لان الناس اصبحت بتعمل كل شىء غلط وبيسموه فى الاخر حب ..
لكن الحب من المنظور الطاهر النظيف فهو شىء راااااااااائع جدا ً حقيقى .



هل انت عصبى ؟؟
لا عادى بس سعات يعنى ..

وانت صغير كان نفسك تطلع ايه ؟؟
الاول مدرسه وبعد كده صحفيه

عندك اخوات ولا لأ وبتعملهم ازاى ؟؟
اه عندى اختين واحده اكبر وواحده اصغر انا الوسطى يعنى 
وعلاقتنا ببعض صداقه والحمد لله وطبعا ً فى رخامة الاخوات والهبل ده 

ايه رأيك فى الصداقه بين الولد والبنت ... ؟؟
بص انا كان ليا فى مدرستى بتاعة ثانوى زمايل ولاد وكان فى منهم فعلا ً اللى زى اخواتى جدا ً كان كل اسرارهم معايا بس انا دلوقتى شايفه ان ده كان غلط لان ما ينفعش اى علاقه تربط بين اى بنت وولد ..
يعنى مثلا ً انا لما اتجوز وماشيه مع زوجى فى الشارع واقابل واحد منهم هقوله ده صديقى .. اكيد ما ينفعش والقرآن بيقول ولا متخذات اخدان بس فالحمد لله انا حاليا ً مش بقتنع خالص بالحكايه دى ..

مين اكتر شخص لما تعد معاه بتحس انك هتموت من الضحك فعلا ً ؟؟
لا ناس كتير من صحابى احنا دايما ً اعدتنا مع بعض لا تخلوا من الضحك المتواصل


من اقرب حد ليك من اللى حواليك؟
ممكن اختى الكبيره بينى وبينها سنه هى مش كبيره اوى يعنى وواحده صاحبتى بردوا بنحب بعض اوى وزى الاخوات وماما طبعا ً وقريبالى اوى ..

موقف حصل واندهشت منه؟
موقف حصلى كنت مره راجعه انا واتنين صحابى فى المترو من الكليه
وفى واحد شاب دخل اعد جنبنا واحنا كنا بنتكلم عن الكليه وكده المهم لقيته فجأه دخل فى الكلام وسألنا انتوا هندسه قلت له ايوه واعد بقى يتكلم كتيييييير هو كمان اصله هندسه بس القاهره واعد يحكى على الاقسام ويسألنا عايزين تدخلوا قسم ايه وكده يعنى .. طبعا ً انا كنت مزهوله وبعد كده لقيته سأل على اسمينا كلنا انا مردتش وبصيت من الشباك بقى بس واحده من صحابى قالت له المهم وفى الاخر طلب رقم الموبيل طبعا ً رديت بقى المره دى بس دخلت فى شمال الصراحه قلتله اكيد لا يعنى .. بس المدهش اكتر انه كان بيناقشنى لا ليه .. ؟؟
وقالى انى عشان لسه اول سنه كليه ومش واخده على كده بكره هيبقى معاكى ارقام نص الكليه قلتله والله لو افترضنا لو حصل على الاقل اسمهم زميلى فى الكليه لكن مش زمايلى فى المتروو .. طبعا ً هو قام ومنظره كان .........
بس لحد دلوقتى انا مش متخيله ازاى يعنى 


اكتر اكله بتحبها واكتر اكله مش بتحبها؟
لا مش فى دماغى حاجه معينه ..


ياترى راضى عن نفسك ناو ولا ايه؟
حاليا ً لا خاااالص .. عشان انا بضيع وقت كتيير اوى على النت وعندى امتحانات وبكره عندى امتحان ومش عارفه حاجه ..


مقلب اتعمل فيك؟
مقلب كان اتعمل وانا فى اولى ثانوى بس مش هينفع احكيه يعنى


نفسك فى ايه تعملو قبل ماتتموت بعد الشر طبعا
نفسى محدش يكون زعلان منى ابدا ً ونفسى ربنا يكون راضى عنى عشان ادخل الجنه .


امتى اخر مره عيطت فيه؟
…………………..



امتى حسيت انك اتظلمت ؟
اكيد فى مواقف كتير مش فاكره حاجه بالظبط دلوقتى بس انا دى اكتر حاجه بتزعلنى فعلاً ان حد يظلمنى او يظن فيا ظن خاطىء

قولى ايه اكتر عيوب بتكرها فى اى شخص وتخليك مش عايز تتعامل معاه …
عيوب انه يكون مغرور يكون يتاع مصلحته وانى اكون مش بستريح له نفسيا ً
وانه يكون بيفهم الناس حاجه معينه عن نفسه وهو مش كده اصلا ً بتخنق من الناس دى جدا ً ..


هل انت شايف نفسك
منظم ؟؟ ... يعنى نوعا ً ما ايوه
رغاى ؟؟ .. ايوه بردوا واعتقد انتوا كمان حسين بكده يعنى
كسول ؟؟ .. سعات
لعبى ؟؟ جــــــــــــــدا ً .


- ايه اكتر حاجه بتحبها فى نفسك واكتر حاجه مش بتحبها ..؟؟
سعات بحس انى بتكلم حلو اوى .. اللى مش بحبه فى نفسى انى مش عارفه اتحكم فى نفسى كويس فى موضوع المذاكره ده ..

ايه اكبر غلطه عملتها فى حياتك ..؟؟
لا مفيش غلطه اقدر اقول انها الاكبر يعنى ..


انت مرتبط
لا
حبيت كام مره
حب حب يعنى ولا مره

طب حبيت بجد كام مره
تانى .. ايه ده

اتسليت كام مره
لا انا ما بتسلاش ولاد الناس مش لعبه 

عاوز مقلب جامد انت عملته فى حد
مقلب انا عملته .. لا كتيييييييييير كنت زمان بتكلم مع اى حد يضيفنى وكده
وطبعا ً اى ولد بقى بيكلم بنت يقولها حطى صورتك والهبل ده المهم مره يعنى كنت مهيسه وادت ارخم على واحد ولما قالى حطى صورتك حطيت صورة طفله سودااااااا وشعرها وحشششششش وقرف يعنى  بس ..

امتى اخر مره كدبت فيها ؟ واكنت ايه الكذبه ؟؟
اخر مره كانت امبارح كدبت عشان خاطر امنع مشكله كانت هتحصل
طبعا ً مش معنى كده انى البت الفظيعه اللى مش بتكدب ابدا ً يعنى بس الحجات دى هى اللى بتعلم مع الواحد و دى كانت اخر مره فعلا ً ..


ظلمت حد قبل كده ؟
اه ..ممكن للاسف بس اكيد انا مش قصدى 


ايه اكتر اغنيه لما بتسمعها بتحس انها بتحكي عنك ؟
انا بصراحه حاليا ً مش بسمع اغانى او بحاول انى ما اسمعش تانى يعنى ..
بس لما كنت بسمع كان فى حجات بحس فيها بكده ... مش فاكره يا بندوق حاجه معينه دلوقتى .



ودى شويه اسأله مش فاهمها لحد دلوقتى
-هل انت موالى للحكومه ام بتؤيدها؟
اكيد لا مش بأيدها خالص ..


هل فكرت فى الانضمام الى الحزب الحاكم؟
لا مش بحب حوار الاحزاب ده ..


-اين انت من الاحداث الراهنه الملتهبه على الساحه السياسيه؟
زى اى حد ولا على باله وعايش حياته عادى بس والله انا مضايقه من حاله التطنيش دى
ونفسى يكون ليا دورايجابى اكتر من كده ..

-اذا كان ردك بأنك غير مؤيد للحزب الحاكم..فهل ترحب بالانضمام الى المعارضه؟
لا بردوا .. هبقى عملت ايه يعنى ..


-ماذا تعنى لك كلمة سياسه؟
كلمة سياسه بعبع الناس كلها .. وعملت رابط عندنا بالسجن واللى يتكلم يروح ورا الشمس


هل انت (ناصريا-ساداتيا-مباركيا-جماليا)؟..اين انت من هؤلاء؟.!!

والله انا شايفه ان كل واحد منهم له مميزات وله عيوبه ..
كل واحد عمل حجات كتييييير للبلد وعمل حجات بردوا ضد البلد وطبعاً مش هنقلب الموضوع سياسى بس انا مش بحب اللى يقول انا ناصرى ولا ساداتى ولا كده ...
من الاخر كل واحد بيوصل للكرسى بيعمل بلاوى .. وبيعمل بعض الحجات الكويسه .




السؤال بتاعك بقى
اوصفلى اربعه من المنتدى متكونيش شوفتيهم ابل كده
اتنين ولاد واتنين بنات
وبلاش حكايه غبات السفانا وبياكل عيش مبلول والكلام ده
ماشى .. اولا ً مشمش : انا مش عارفه ليه متخيلاها شبه منى زكى .. مع انى متأكده انها مش كده بس عشان هى كانت حاطه الصوره دى على طول وادتنى الانطباع ده ..

سمسمه : متخيلاها صغيره وقصيره سمسمه بقى 

حجازى : متخيلاه طويييل .. ولابس نظاره وتقريبا ً كان حد قال انه مربى لحيته بس انا مش متخيلاه كده ... مش عارفه

بندوق : متخيلاه تخييييييييين .. اسمك بيوحيلى بكده
عارف قلبظ اللى بيتلع فى الاعلانات بتاعة الكاراتيه قلبظ ده هو انت بالظبط 
اوعى تزعل بس انا عندى رابط ان دايما ً التخان دمهم خفيف اوى

شوفتوا جاوبت على كل الاسئله دى .. المفروض اخد راحه اسبوعين بعدها
اشوف فيك يا يوم ياللى فى بالى .. يا قلبظ

والله وحشتوووووووووووونى يا شله

اخييييييييييييييييييييييييرا خلست الميدزفت

على فكره يا بندوق انا وشى مش مكلبز خالس
انا شعرى بنى وعينى عسلى ( وبتقلب اخضر بالليل )

ساره

يا ويلكم يا ويلكم

ايه اكتر حاجه بتحبيها فى ساره ؟؟
اكتر حاجه بتشدك للانسان اللى قدامك (شكلو ولا كلامو ولا...) وبتفضلى الانسان
اللى عامل ازاى رغاي ولا هادى ولا عملى ولا ايه ؟
بتدخلى على النت ليه ؟؟
ايه الحاجه اللى بتكونى مبسوته وانتى بتعمليها ؟؟
لما بتخرجى بتحبي الاماكن الهاديه ولا الزحمه ولا السينما ولا ايه بالظبط ؟
مين بتحبي تخرجى معاهم اخواتك ولا اصحابك ؟؟
موقف خلاكى تحبي نفسك اوى ؟؟
موقف خلاكي زعلتى من نفسك اوى ؟؟

انا عارف ان انتى عندك امتحان عشان كده سالت باختصار
مع انك الغاليه اللى عملت التوبك ده وعصرتينى 2 ويكس ويوم